Kommunit nalunaarsuiffiannit tingusat

Isumaginninnermut nalunaarsuutit tunngaviusut kommunit nalunaarsuiffianninngaanneerput. Nalunaarsuutit Kommunit akuerisaannik KIMIK IT A/S-imit tinguneqarput. Isumaginninnermut naatsorsuutit allattorsimaffiat aammalu nalunaarsuutit tunngaviusut qulequttani tulliuttuni taaneqartut Datatilsynemit akuerineqarlutik nassuiarneqarput.

 

Nalunaarsuutit tigussaasut

Isumaginninnermut tunngasuni naatsorsuutini nalunaarsuutit pingaarnerit tassaapput:

 

·       Inuup normua

·       Ikiorsiissut (ikiorsiissutip suunera ammalu aningaaserivimmi konto normu)

·       Ikiorsiissutit tigunerini ulloq (ulloq, qaammat aammalu ukioq)

·       Ikiorsiissutit annertussusaat (aningaasat amerlassusaat koruuninngorlugit)

 

Kisitsisitigut paasissutissani aaqqissuussineq

Kisitsisitigut paasissutissat tunngaviusut allaffissorluni aqutsinermi nalunaarsuiffinninngaanneerput naatsorsueqqissaarnikkut atugassatut ineriartortitaanatik, taamaattumillu naalunaarsuutit tunngaviusut suliareqqillugit nalilersorlugillu suliaapput.

 

Nalunaarsuutinik nalilersuineq

Ikiorserneqarsimasut allattorsimaffinni ilaasut ikiorserneqareernerup kingorna ikiorsiissutinik utertitsisimasut (ikiorsiissutigineqartunik taarsiisimasut) kukkunermilluunniit allattorsimaffimmiittut naatsorsuutinut ilaanngillat. Inuup normui atorsinnaanngitsut nakkutiginnilluni ingerlaaseq atorlugu peerneqarput, nalunaarsuutillu tunngaviusut nalilersorneranni kommunit naatsorsuuseriviini ikiorsiisutinillu tunisinermi nalunaarsukkani kukkuneqarsinnaasoq paasineqarpoq.

 

Kommunit naatsorsuuseriviini kisitsisitigullu paasissutissani saqqummiunneqartuni ikiorsiinerit ukiup siuliani pisut ilaasinnaapput, soorlu ikiorsiinerup pereerneratigut akiliinerit akinut malittarisassaliorsimanerup kinguneratigut pisimasut, taamaattumillu aningaasat amerlassusaat akinik malittarisassaliorsimanerup kingunerisaanit ikiorseereererni akiliisimanertut nalilersukkat 500 kr.-it ataallugit annertussusillit piaarneqarput. Pisortanit ukiup ingerlanerani ikiorserneqarsimasutut naatsorsuinermi inuit 500 kr.-inik anginermilluunniit ikiorserneqarsimasut naatsorsuutini killigititaapput suliffeqanngikkallarnermilu aammalu ernereernermi ullormusianut allanullu 1.000 kr.-it killigititaallutik.